ՙՏԱՐՎԱ ԼԱՎԱԳՈՒՅՆ ՄԱՐԶԱՅԻՆ ԲՈՒԺՀԻՄՆԱՐԿ «ՄՐՑԱՆԱԿԸ» ԳՅՈՒՄՐԻ ԲԺՇԿԱԿԱՆ ԿԵՆՏՐՈՆԻՆ

Առողջապահության զարգացման տեմպերը շարունակ նոր պահանջներ են սահմանում ոլորտի կառույցների համար: Այս համատեքստում, արդի միտումներին համընթաց, Գյումրի բժշկական կենտրոնում առանձնահատուկ կարևորություն ունեցավ «Կյանքի ստենտ» ՀՀ նախագահի ծրագիրը, որը ՀՀ ԱՆ կողմից ներդրվեց 2015-ի հունվարի 1-ից: Այն ուղղված է բնակչությանը պետության կողմից երաշխավորված անվճար բժշկական օգնության և սպասարկման շրջանակներում սրտի անհետաձգելի վիրահատական ծառայություններ մատուցելուն: Նախապես ընտրված բժշկական կենտրոններում եռամսյա փուլով իրականացվող այս ծրագրի ժամանակահատվածում շնորհիվ Գյումրի բժշկական կենտրոնի գործադիր տնօրեն Արմեն Իսահակյանի և մասնագիտական անձնակազմի գործնական հմտության` այս տարվա հունվարի 1-ից մինչև մարտի 31-ը կատարվել է 18 պացիենտի սրտի անհետաձգելի վիրահատություն, ովքեր 36-86 տարիքային խմբում են:

2015 թ. ընթացքում իրականացվել է 51 ոչ դեղապատ ստենտավորում: Այնուհետև, Առողջապահության նախարար Ա. Մուրադյանի գլխավորությամբ ստորագրվեց նոր փոխըմբռնման հուշագիր մինչև սույն թվի դեկտեմբերի 31-ը ժամանակահատվածով: Տնօրեն Արմեն Իսահակյանի հաղորդմամբ` «Կյանքի ստենտ» ծրագիրը նկատելիորեն նվազեցրեց մահացությունների թիվը Շիրակի մարզում և Գյումրի քաղաքում: Այս ծրագրի մասին քաղաքացիներին հաղորդակից դարձնելու նախարարության տարաբնույթ իրազեկման եղանակներին միացավ նաև տնօրեն Ա. Իսահակյանի  մտահղացմամբ տեղեկատվական գրքույկի հրատարակումը, որի հեղինակն է բուժհիմնարկում և ոլորտում լավագույն միջամտական սրտաբան Կարեն Միքայելյանը: Բուժհիմնարկի հասարակայնության հետ կապերի և լրատվության բաժնի պատասխանատու Նարեկ Կիրակոսյանի հաղորդմամբ` իրազեկող այս գրքույկները տրամադրում են ո՛չ միայն  քաղաքացիներին, այլ նաև այլ բուժհաստատությունների սրտաբաններին:

Վերջերս տնօրեն Ա. Իսահակյանը և միջամտական սրտաբան Կ. Միքայելյանը եղել են Աշոցքի ՙՏիրամայր Նարեկ՚ բուժկենտրոնում և գործնական հանդիպում ունեցել տեղի մասնագետների հետ: Այսօրինակ հանդիպումներ են սպասվում Գյումրու պոլիկլինիկաների, Շիրակի, Լոռու, Արագածոտնի և Արմավիրի մարզերի սրտաբանների հետ: Այսպիսով, պացիենտն այս ծրագրի մասին կծանոթանա նաև ընտանեկան բժշկից, ինչպես նաև այցելելով բուժհիմնարկի պաշտոնական վեբ կայք` gyumrimc.am:

Նշենք, որ, քաղաքակիրթ բուժսպասարկմանն ընդառաջ, 2015-ից անցել են ծառայությունների մատուցման պայմանագրային համակարգին՝ համաձայն ՀՀ առողջապահության նախարարի 2011 թ. փետրվարի 1-ի N104-Ա հրամանի հավելվածի: Տնօրենի գնահատմամբ‘ այս ծրագրի ներդրումը նպաստեց բուժկենտրոնի կողմից ավելի պատշաճ որակով ու բժշկական ցուցումների համաձայն անհրաժեշտ ծավալով ծառայությունների մատուցմանը, ինչի դիմաց պատվիրատուն պարտավորվում է վճարել պայմանագրով սահմանված չափով ու կարգով: Ա. Իսահակյանի հետևողականությամբ կարևոր  ձեռքբերում է նեղ մասնագետներով համալրումը բուժկենտրոնում, ինչպես օրինակ` ամռան ամիսներին աշխատանքի ընդունվեց կրծքային վիրաբույժը: Մեկ տարվա ձեռքբերումների առհավատչյան բուժկենտրոնին տրվող պարգևներն են:  Համաձայն «Համազգային վստահության խորհրդի» քաղաքացիների և ԶԼՄ-ների շրջանում կատարած հարցումների» 2015 թ. «Հուսո աստղ» մրցանակաբաշխության ժամանակ «Գյումրի բժշկական կենտրոնն» արժանացավ «Տարվա լավագույն մարզային բուժհիմնարկ» մրցանակին: Ի կարևորումն լայն հասարակության իրազեկման ու գործունեության առավել թափանցիկության` այս տարի բուժկենտրոնում Ա. Իսահակյանի նախաձեռնությամբ ստեղծվեց Հասարակայնության հետ կապերի եւ լրատվության բաժինը: Ուշագրավ է նաև այն, որ կենտրոնը գերազանցել է մեկ տարվա կտրվածքով հատկացված պետպատվերի շրջանակում իրականացվելիք բուժսպասարկումը, որի արդյունքում ՀՀ ԱՆ կողմից  կրկին ֆինանսավորվել է: Հավելենք, որ այս տարվա ընթացքում այստեղ բուժվել է 7350 հիվանդ, որից 5830-ը` պետպատվերի շրջանակում:

Ներկայում լուրջ խնդիրներ չունեն` կապված սարքավորումների կամ մասնագետների բացակայության հետ: Այնուհանդերձ, ձգտում են թարմացնել ակնաբուժական ծառայության մի քանի սարքավորումներ՝ ճեղքային լամպ, պերիմետր և ավտոռեֆարակտոմետր, որոնք 10 տարվա վաղեմություն ունեն: Թեպետ ծառայության վիրահատարանն ապահովված է առաջին անհրաժեշտության վիրահատական սարքավորումներով և գործիքներով, այդ թվում` միկրոսկոպով:

Տեղական ու միջազգային առողջապահական կազմակերպությունների հետ գործակցության շրջանակում բուժհիմնարկի մասնագետները հնարավորություն են ստանում անցնել մասնագիտական խորը վերապատրաստումներ եվրոպական առաջատար կազմակերպություններում:Հեռահաղորդակցության բարձրորակ հնարավորություններով հագեցված աշխատասենյակներում ուղիղ տեսակապով քննարկումներ են իրականացնում տեղական ու արտերկրյա մի շարք բուժկազմակերպությունների հետ:

Վերջերս «Շիրակ Հայրենակցական միավորում» ՀԿ հետ համագործակցության շրջանակներում իրականացրեցին «բաց դռների» օրեր, որոնց ընթացքում 361 քաղաքացի հետազոտվեց բոլոր մասնագիտություններով: Տնօրենի հաղորդմամբ` 2016 թվականից համագործակցության նոր փուլ են սկսելու ՀՀ ԱՆ և ԱԱԻ հետ, որի շրջանակներում նախատեսվում է Գյումրիի բժշկական կենտրոնի բուժքույրական անձնակազմի համար սեմինարների ու գործնական աշխատանքների կազմակերպում:

Աղբյուրը՝

«Գործընթաց» շաբաթաթերթ