Պացիենտների համար / Ախտորոշում / Ինչ է պետք իմանալ կորոնարոգրաֆիայի մասին

Եթե բժիշկը ախտորոշել է սրտի իշեմիկ հիվանդություն (ՍԻՀ), որը դրսևորվում է կրծքահեղձուկով (ստենոկարդիա), սրտամկանի ինֆարկտով, առիթմիաներով և (կամ) ձախ փորոքի կծկողական ֆունկցիայի խանգարմամբ (ձախ փորոքի արտամղման ֆրակցիայի իջեցմամբ), ապա բժիշկը պետք է խորհուրդ տա անցնել կորոնարոգրաֆիկ հետազոտություն:

Ինչու պետք է կատարել կորոնարոգրաֆիա

Որպեսզի ճիշտ ընտրվի ՍԻՀ-ի բուժումը, պետք է պարզել. դիտվու՞մ են, արյոք, սիրտը սնուցող անոթների` պսակաձև (կորոնար) զարկերակների ախտահարումներ, ո՞ր զարկերակները, ո՞ր հատվածներում, որքա՞ն են ախտահարված:

Այս բոլոր հարցերին կարող է պատասխանել միայն կորոնարոգրաֆիան:

Ի՞նչ է կորոնարոգրաֆիան

Կորոնարոգրաֆիան սիրտը սնուցող անոթների` պսակաձև (կորոնար) զարկերակների հետազոտման եղանակ է, որը ցույց է տալիս պսակաձև (կորոնար) զարկերակների վիճակն ու ախտահարման աստիճանը: Կորոնարոգրաֆիան միջամտական մեթոդ է, որի ժամանակ աճուկային շրջանից (ազդրային զարկերակից) կամ ձեռքից (ճաճանչային զարկերակից) հատուկ կաթետերով՝ ռենտգեն ճառագայթների հսկողությամբ, հասնում են սիրտը սնուցող զարկերակներին (նկ. 1):

Այնուհետև ռենտգենկոնտրաստային նյութը ներարկում են և գրանցում զարկերակների վիճակը: Ռենտգենկոնտրաստային նյութը արյան հետ հոսում է անոթներով: Այս գործընթացը գրանցվում է DVD-R սկավառակի վրա և տրամադրվում հիվանդին:

Նկ. 2-ում և նկ. 3-ում երևում են նորմալ պսակաձև զարկերակների կորոնարոգրաֆիկ պատկերները:

Նկ. 4-ում և նկ. 5-ում երևում են աթերոսկլերոտիկ ախտահարված պսակաձև զարկերակներ ունեցող հիվանդի կորոնարոգրաֆիկ պատ-կերները:

Ի՞նչ է կատարվում Ձեզ հետ մինչև կորոնարոգրաֆիան, կորոնարոգրաֆիայի ընթացքում և հետո:

• Դուք չպետք է խմեք և ուտեք առավոտյան կորոնարոգրաֆիայից առաջ:
• Կատարվում է մի շարք հետազոտություններ. արյան ընդհանուր և բիոքիմիական հետազոտություններ, մեզի ընդհանուր հետազոտություն, ԷՍԳ, Էխո-ՍԳ հետազոտություններ:
• Սափրում են աճուկային և ձեռքի շրջանի մազերը:
• Միջամտության ընթացքում հանգիստ պետք է պարկեք մեջքի վրա՝ հորիզոնական դիրքով:
• Աճուկային և ձեռքի շրջանը մշակում  են բետադինով կամ այլ ախտահարիչ նյութերով:
• Ծածկում են ստերիլ ծածկոցով:
• Աճուկային կամ ձեռքի շրջանում կատարվում է տեղային անզգայացում:
• Զարկերակի մեջ տեղադրվում է հատուկ խողովակ (ինտրադյուսեր), որի միջով կաթետրեները հասնում են սրտին:
• Մեծամասամբ կորոնարոգրաֆիան անցնում է անցավ:
• Եթե միջամտության ընթացքում Ձեզ որևէ բան անհանգստացնում է, անպայման պետք է տեղեկացնել բժշկին:
• Որպես կանոն, կորոնարոգրաֆիան տևում է միջինը 30-40 րոպե:
• Միջամտությունից հետո բժիշկը հանում է հատուկ խողովակը (ինտրադյուսերը) և որոշ ժամանակ սեղմում, որից հետո դրվում է ճնշող վիրակապ (6 ժամ):

Որքանո՞վ է անվտանգ կորոնարոգրաֆիան

Կորոնարոգրաֆիայի ժամանակ բարդությունները (ոչ մահացու) չեն գերազանցում 1%-ը և կախված են Ձեր սկզբնական վիճակից և ուղեկցող հիվանդություններից:  

Կորոնարոգրաֆիայի արդյունքներից կախված ի՞նչ պետք է անել

Պսակաձև զարկերակների կորոնարոգրաֆիայի ժամանակ հայտնաբերված ախտահարվածության աստիճանից կախված՝ բժիշկն առաջարկում է բուժման 3 մեթոդներից մեկը.

• դեղորայքային բուժում,
• վիրահանական բուժում (աորտո-կորոնար շունտավորում),
• պսակաձև զարկերակների բալոնային անգիոպլաստիկա և ստենտավորում:

«Գյումրի» բժշկական կենտրոնի միջամտական սրտաբան Կարեն Միքայելյան

«Ստենոկարդիա» տեղեկատվական գրքույկից