19.10.2015
Տարիների ընթացքում նկատում ենք, որ մեր հիշողությունն ավելի ու ավելի է վատանում. ծննդյան թվերը, իրադարձությունները, անուններն ու հեռախոսի համարները, կինոնկարների անվանումները մոռացվում են և էլ ավելի է դժվարանում դրանք հիշելը:
Որն է պատճառը և ինչ անել
Մեր հիշողությունը տարիների հետ նմանվում է մի սենյակի, որը լիքը լցված է ամենատարբեր պիտանի և անպետք առարկաներով: Դրանցից շատերը, հնարավոր է, թանկ են ձեզ համար, սակայն դա պարզապես անպիտանի է օգտագործման, որն այդպես էլ չեք կարողանում դուրս հանել: Նույն համեմատությունը կարելի է անել նաև համակարգչի հետ: Եթե այն գերծանրաբեռնված է, ապա սկսում է աղմկել, տաքանալ, կայքերը մեծ դժվարությամբ են բացվում: Անշուշտ, այդ դեպքում օգնում է տեխնիկական առաջընթացը, այսինքն, կարող եք նոր ֆլեշ-հիշողություն գնել կամ ավելորդ տեղեկատվությունը հավաքել սկավառակների վրա ու պահել:
Իսկ ինչպես վարվել սեփական հիշողության գերծանրաբեռնվածության հետ: Փորձենք այնպես, ինչպես անում ենք համակարգչի հետ, հիշողությունից որոշ տեղեկատվություն հանել արտաքին միջավայր` գրառումների գրքույկ, օրագիր և այլն, որն առավել կնախընտրեք: Բոլոր գործերն էլ կարևոր են. պլանավորեք օրը, շաբաթը, ամիսը, այդ ամենը գրանցեք նոթատետրում և ազատեք գլխուղեղը: Ամեն օր թերթեք նոթատետրը, դա առաջին հերթին կբեռնաթափի հիշողությունը, երկրորդը, հնարավորություն չի տա մոռանալ կամ բաց թողնել որևէ կարևոր իրադարձություն: Շատ օգտակար է բնակարանում կամ գրասենյակում պատերին փոքրիկ թղթերով գրառումներ կպցնել, օրինակ, պայմանավորվածլ հանդիպման, գործարք կատարելու, խանութներ այցելելու, ինչ-որ մեկին զանգահարելու վերաբերյալ: Անընդմեջ տեսադաշտում հայտնվելով, դրանք թույլ չեն տա մոռանալ կարևոր գործերի մասին:
Եվ այսպես, նման ոչ բարդ միջոցներով մի փոքր բեռնաթափում ենք ուղեղը, որոնց մասին բոլորը գիտեն, բայց շատերը չեն հետևում, որպեսզի դրանք պարբերաբար օգտագործեն:
Մի քանի խորհուրդ այն մասին, թե ինչպես հանգստացնել ուղեղը
- Ուղեղի համար ամենալավ հանգիստը կարճատև վազքն է: Ժամանակավորպես մոռացեք բոլոր խնդիրների մասին, ականջակալներով սիրած երաժշտությունը լսեք, գլխից հանեք բոլոր մտքերը և աշխատեք լիցքաթափվել: Տուն կամ գրասենյակ վերադառնալով, զարմանքով կնկատեք, թե ինչքան են պայծառացել ձեր մտքերը:
- Եթե հնարավորություն չունեք աշխատանքային օրվա սկսվելուց առաջ կամ դրա ընթացքում վազել, ապա կարող եք դա տեղում կատարել, աշխատանքից չկտրվելով:
- Քունքերի թեթև մերսում կատարեք. մի քանի րոպեի ընթացքում մատների ծայրերով շրջանաձև շարժումներով շփեք դրանք: Այդ ընթացքում աշխատեք փակել աչքերը:
- Ուղեղի հանգստանալուն շատ օգտակար է երաժշտաթերապիան. երաժշտություն լսելու համար օգտվեք ականջակալներից 10-15 րոպեի ընթացքում: Երաժշտությունը պետք է ցածր լինի, հաճելի և անպայման առանց բառերի: Աշխատեք կանգնեցնել մտքերի հոսքը և որոշ ժամանակ ոչ մի խնդրի մասին չմտածել: Դա բավականին դժվար է, սակայն հնարավոր է, եթե սովորություն դարձնեք: Եթե աշխատավայրում երաժշտություն լսելիս վախենում եք քնով անցնել, ապա միացրեք նաև զարթուցիչը:
- Ուղեղի բեռնաթափման և հանգստի համար գերազանց միջոց է արոմաթերապիան: Այն ավելի լավ է անցկացնել տան պայմաններում: Գնեք հատուկ լամպ և բերգամոտի եթերայուղ, ժամանակ առ ժամանակ յուղը մի փոքր կաթեցրեք լամպի վրա և թողեք ամբողջ սենյակն այդ հոտով տարածվի, արդյունքն անմիջապես կզգաք:
- Չմոռանալ նաև առողջ կենսակերպի և ճիշտ սննդակարգի մասին: Դա կօգնի ձեզ երկար տարիներ պահպանել մտքերի թարմությունը:
