17.07.2015
Հուլիսի 16-ին «Գյումրի» բժշկական կենտրոնում տեղի ունեցավ սեմինար-պարապմունք` «Բուժքույրերի արդի հարցերը» թեմայով: Այն կազմակերպվել էր «Գյումրի» բժշկական կենտրոնի տնօրինության եւ «Բուժքույրերի միավորում» ՀԿ Գյումրիի մասնաճյուղի նախաձեռնությամբ:
Բժշկական կենտրոնի ղեկավարությունը, կարեւորելով բուժքույրերի պարբերաբար վերապատրաստումները տարբեր թեմաներով, կազմակերպել էր հերթական սեմինարը «Բուժքույրերի դերը շաքարային դիաբետի բուժման մեջ» թեմայով:
Սեմինարն անցկացնում էին ամերիկյան մի շարք հեղինակավոր համալսարաններից եւ կլինիկաներից հրավիրված բուժքույրեր, ովքեր ունեն պրոֆեսորի աստիճաններ:
Սալբի Ագարակյանը, ով եկել էր Լոս Անջելեսի բժշկական հմալսարանից, կարեւորում է Գյումրու բժշկական կենտրոնի ներգրավվումը նմանատիպ ծրագրերում.
– Երկրաշարժից հետո կամաց-կամաց փոխվում է բուժքույրերի մասնագիտական գիտելիքների մակարդակը: Ես չէի պատկերացնում, որ ընդհանուր բժշկական ծառայություններ մատուցող կենտրոնում բուժքույրը կարող է ունենալ մասնագիտացված կլինիկային բնորոշ գիտելիքներ` շաքարային դիաբետի մասին,- ասում է պրոֆեսոր Սալբի Ագարակայանը:
 |
 |
Սեմինարն անց էր կացնում Հայ-ամերիկյան բուժքույրերի ասոցիացիայի նախագահ Զարմինե Նաքաշյանը: Նրա խոսքերով, պետք է շաքարային դիաբետից խուսափելու համար նախ՝ ճիշտ սնվել:
«Հայ բուժքույրերի միավորում» ՀԿ նախագահ Գեղանուշ Ստեփանյանի հավաստմամբ «Գյումրի» ԲԿ-ի բուժքույրերը, թեեւ ունեն ընդհանուր գիտելիքներ, կարողանում են կատարել նաեւ խորը մասնագիտական աշխատանքներ.
– Ես մեկ ամիս «Գյումրի» ԲԿ-ում սեմինարներ եմ անցկացրել եւ երկու օր անց արդեն պարզ էր՝ բուժքույրերը բավականին գիտելիքներ ունեն: Այս հարցում շատ կարեւոր է նաեւ կլինիկայի ղեկավար Արմեն Իսահակյանի դերը, քանի որ նրա անմիջական միջնորդությամբ յուրաքանչյուր բուժքույր ունի պատասխանատվության զգացում,- ասում է Գեղանուշ Ստեփանյանը:
 |
 |
Նշենք, որ հանդիպման ավարտին բժշկական կենտրոնի տնօրենը խորհրդանշական հուշանվերներ հանձնեց ամերիկահայ բուժքույրերին:
«Գյումրի» բժշկական կենտրոնի հասարակայնության հետ կապերի եւ լրատվության բաժին
